Zorribike elkarteak azaldu duenez, aurreko edizioetan “Elorritxuetatik apur bat beherago atondu da zirkuitua, baina aurtengo kokalekua erosoagoa da”. Lasterketak 9:30ean hasiko dira, eta 14:00etan amaitu. Lehenengo lasterketak hauek izango dira: kadeteak (neskak eta mutilak) eta Master/40/50/60; 11:00etan: scrach (neskak) eta juniorrak (neskak eta mutilak); eta 12:45ean: Sub23 eta elite.
Probak eragozpenak ekarriko dizkio ibilgailuen zirkulazioari. Horrela, Lezama eta Elorritxueta lotzen dituen errepidea aldizka itxiko da trafikorako; Elorritxuetako aparkalekua itxiko da; eta frontoitik Amezelaieta eta Antolarrene baserrietara doan baso-pista ere itxiko da. Zorribike elkarteak Lezamako eta Galdakaoko Udalen eta Bizkaiko Foru Aldundiaren laguntzarekin antolatu dute proba.
Green Series Challenge XCO txapelketa bederatzi proba ditu, martxotik uztailera bitartean egiten direnak. Emaitzak Bizkaiko Txirrindularitza Federazioaren arauei lotutako sailkapen orokorrerako puntuagarriak dira; arauak Espainiako Txirrindularitza Federazioaren arautegiarekin ere bateragarriak dira.
Bestalde, probaren egunean bertan, arratsaldeko 19:00etan, ikastaroa egingo dute Uribarri Topalekuan, bizikletan jarrerarik onena izaten ikasteko.