Administrazio-eremua ere berritu da, eta mostradorearen ordez, mahaiak eta aulkiak dituen arreta-gunea ipini da, erabiltzailea eseri ahal izateko eta “arreta humanoagoa eta hurbilagoa jaso dezan”. Era berean, argiztapena hobetu da, baita instalazio elektrikoa eta suteen aurkako babes-sistema ere. “Hortaz, segurtasun eta erosotasun handiagoa eman zaio zentroari”. Lanek ia hiru hilabete iraun dute, eta bitartean, heldu lezamarrek udaletxeko etxabeetan atondutako gunean jaso dute osasun-arreta. Gaurtik aurrera, osasun-etxea berriro egongo da zabalik, 08:00etatik 15:00etara, eta astelehenetik barikura.
Bihartik aurrera lezamarrek ohiko lekuan jasoko dute osasun-arreta
Lezamako osasun-zentroa eraberritzeko lanak otsailean hasi ziren, eta harrezkero lezamarrek udaletxeko azpialdeko lokaletan jaso dute osasun-arreta. Osakidetzak jakinarazi duenez, eraberritze-lanak amaitu dira eta bihar, maiatzak 10, zabalduko da berriro osasun-zentroa (Aretxalde 80). Azaldu moduan, osasun-laguntza eta -arretarako gunea egokitzeko, gela-kopurua handitu da eta Erizaintzako eta Familiako Medikuntzako kontsultetarako hiru gela atondu dira, lehen baino bat gehiago.