Lezamako Udalak Garaioltzako kirol-instalazioak itxiko ditu jendearentzako arreta-ordutegia amaitutakoan

a: Garaioltzako kiroldegiko frontoia (Lezamako Udala) 2025ko mar. 4a, 11:18

Lezamako Udalak gizarte-sareetan zabaldutako prentsa-ohar batean azaldu duenez, asteburuan ekintza bandalikoak izan dira Garaioltzako kiroldegiko frontoian. Antza, hainbat sute nahita piztu dira bertan, eta azken hilabeteetan ere antzeko gertakariak izan dira. Ekintza bandalikoak salatu eta gaitzesteaz gainera, udalak jakinarazi du prebentzio-neurri moduan Garaioltzako kirol-instalazioak itxiko dituela jendearentzako arreta-ordutegia amaitutakoan.

Ordutegia hau da: astelehenetik barikura, 14:00etatik 22:00etara; zapatuetan, 10:00etatik 14:00etara eta 16:00etatik 20:00etara; eta domeketan eta jaiegunetan, 10:00etatik 14:00etara. “Halako jokabide arduragabeek ez diete soilik pertsonen segurtasunari eta udal-ondareari kalte egiten, herri osoari baizik, eta herritar guztien erabilerarako eta gozamenerako diren leku publikoak kaltetzen dituzte”, idatzi dute prentsa-oharrean. Azaldu moduan, ekintza bandalikoak behin eta berriz gertatzen dira, eta horregatik egin dute erantzukizunerako eta bizikidetzarako deia, “halako ekintzak burutzen dituztenei jarrera hori alde batera uzteko eskatuz”.

Azkenik, Lezamako Udalak adierazi du leku publikoak babesteko eta zaintzeko lanean jarraituko duela, “haien egoera egokia eta erabilera zuzena bermatzeko beharrezko neurriak hartuz”. Era berean, laguntza eskatu die herritarrei, “halako jokabideak errotik kentzeko eta guztion ingurunea babesteko”.