Urtarrilaren 31n, zapatuan, Putxera Nazioarteko Txapelketa egingo da laugarren aldiz Loiun. Txapelketak oso erantzun ona eduki du antolatzen hasi zen lehenengo urtetik, eta aurten ere parte-hartze handia egotea espero da. Izena emateak bost euro balio du eta hori goizeko 9etan egin beharko da. Parte-hartzaileek osagai hauek erabili beharko dituzte putxerak egiteko: indaba gorria, saiheskia, odolostea, txorizoa, urdaia, berakatza, kipula, piperra, porrua eta azenarioa. Putxerak eguerdiko 2etan aurkeztu beharko dira. Erromeria egingo da arratsaldeko 4:30ean bazkalondoa girotzeko, eta sariak 18:00etan banatuko dira. Orotara 25 sari emango dira. Txapeldunak 290 euro, txapela eta urrezko garaikurra jasoko ditu; 250 euro eta zilarrezko trofeoa, bigarrenak; 200 euro eta brontzezko trofeoa, hirugarrenak; 150 euro, laugarrenak; eta 100 euro, bosgarrenak. Era berean, trofeoak eta txakolin eta ardo-kutxak banatuko dira seigarren postutik 25. postura bitartean gelditzen direnen artean. Putxerarik onena egiten duen loiuztarrak ere jasoko du saria.