Kaotiko, Oxabi eta Fuk Sinatza taldeek zapatuan joko dute, eta Kepa Junkerak kontzertua eskainiko du domekan. Bestetik, Luhartz taldea eguenean arituko da, eta bilbainadak izango dira Mikel Basaberen eskutik. Udalak autobusa ipiniko du doan, txorierritarrak zein bilbotarrak Loiuraino hurbil daitezen eta etxera itzul daitezen.
Azaldu duten moduan, jai-batzordea orain dela zazpi urte desegin zen eta handik hona Udalak berak hartu du jaiak antolatzeko ardura. Nolanahi ere, herriko elkarteen lana azpimarratu dute, haiek ere jaietan parte hartzen dutelako. “Oso harreman ona dugu eta horri esker antola ditzakegu guztioi zuzendutako jai herrikoiak”. Elkarteak hauek dira: Loiuko Bakarrak, Loiu Laztana, Li Karate Loiu, Taekwondo Doyan Yeol Loiu, Irtxan pilota elkartea, Nagusien etxea eta Larrakoetxe herri kirol taldea.
Kultura Sailekoak azaroan hasi ziren herritarrekin batzen, euren ekarpenak eta ideiak jasotzeko. “Haien ekarpenak kontuan hartu eta adin guztietako loiuztarrei zuzendutako kontzertu-saila antolatu ahal izan dugu, garrantzitsua eta kalitatekoa dena”.