Bestetik, Nekazaritza azoka hurrengo egunean, urriaren 21ean, domekan, izango da. Postuak Udaletxeko eta Alonsotegi plazetan ipiniko dira eta bertara gure ortuko produkturik onenak eramango dira. Gainera, herriko ekoizleek ere beren produktuak aurkeztuko dizkiete loiuztarrei eta bisitariei. Udaletik azaldu duten moduan, urtero ahaleginak egiten dituzte azokan bitxikeria edo berritasunaren bat aurkezteko –iaz, adibidez, kanguruak izan ziren – eta aurten ere sorpresaren bat egongo da. Oilasko errea eta txakolina dastatu ahalko dira, eta tren txu-txu batek bidaiariak eramango ditu herritik bueltatxo bat egitera.
Garagardo azoka urriaren 20an, zapatuan, egingo dute 19:30etik aurrera Udaletxeko plazan. Bertan, gure lurraldean ekoizten diren sei garagardo artisau dastatzeko aukera egongo da, eta janari postuak ere ipiniko dira. Horrezaz gainera, tailerrak egongo dira eta parte-hartzaileek hainbat galdera egin ahalko dituzte garagardoaren ekoizpen prozesuari buruz. Deabru beltzak taldeak ikuskizuna eskainiko du, eta erromeria ere egongo da.