Zapatuan garagardoa izan zen protagonista. Guztira bost ekoizlek aurkeztu zituzten euren produktuak Loiun. Horietako bi Txorrierrikoak izan ziren: Urban Beer eta Txorierri Garagardoak. “Upeltegiek euren produktuen ezaugarrien berri eman zuten, tailerrak eskaini zituzten eta, batez ere, garagardoa dastatzeko aukera egon zen”. Gainera, beste produktu batzuk ere jarri ziren salgai: gozokiak, opilak, taloa... Eguna borobiltzeko, Deabru Beltzak eta Akerbeltz taldeek ikuskizunak eskaini zituzten gauean.
Domekan Loiuko azoka egin zen. Eguraldi zoragarria egin zuenez, jende pilo bat batu zen bertan. Baserriak emandako hainbat produktu erosteko aukera egon zen Loiuko plazan. Gainera, frontoian, zenbait artisauk euren produktuak eskaini zituzten: gerrikoak, txanoak, makilak... Era berean, txapelak eta gazta egiteko tailerrak antolatu ziren eta Udalak txirrista erraldoi bat jarri zuen txikienen eskura. Azokarekin batera, herri kirolak ere izan ziren Loiun. Bertan, Lasuen HKT taldeak Bizkaiko Herri Kirol Ligaren finala irabazi zion Arratzuko Piratak HKT taldeari.