Logoa
Logoa
aikor.eus

143 kuadrillak hartu zuten parte Loiuko Putxera txapelketan

  Festak  Loiu

Urtarrilaren 26an, Loiuko Udalak Nazioarteko Putxera Txapelketa antolatu zuen zortzigarren aldiz. Guztira, 143 kuadrillak hartu zuten parte txapelketan, iaz baino sei gehiagok. Horien artean 30 sari baino gehiago banatu ziren. Epaimahaikideen ustez, Joseba Koldobika Larrauri getxoztarrak prestatu zuen putxerarik onena. Era berean, Loiuko indabarik gozoenak Izaskun Aurrekoetxeak egin zituen.

Azken egunotan oso eguraldi txarra egin du, baina zapatuan atsedena eman zuen, euririk egon ez zelako. Giro aparta egon zen egun osoan: lehiaketa goizean egin zen, eta ostean, herri bazkaria. Han 400 lagun baino gehiago batu ziren. Herriko frontoian guztiontzako lekurik egon ez zenez, batzuk plazan gelditu ziren bazkaltzen. Bazkalostekoa girotzeko, Akerbeltz taldeak erromeria eskaini zuen.

“Udala, antolatzaileok, poz-pozik gabiltza. Hobetzeko zerbait beti dago, baina ezin dugu gehiagorik eskatu: eguraldi ona, jende asko, parte-hartzaile gehiago… Horietako batzuk kanpokoak dira: Reinosa, Orduña, Balmaseda… Eta gehienak aurreko urteetan ere etorri ziren. Izan ere, Putxera Txapelketara etortzen dena hurrengo urtean berriro ere etortzen da”, esan du Idoia Bilbao zinegotziak. “Eskerrak eman nahi dizkiegu txapelketan parte hatu dutenei eta laguntza eskaini digutenei. Horiek datorren urtean txapelketa berriro antolatzeko gogoa piztu digute”.  

Erantzun

Erantzuteko, izena emanda egon behar duzu. Sartu komunitatera!

»» Alta eman edo pasahitza berreskuratu


Twitter ikonoa Facebook ikonoa