Lauroetako pasealekua berritu da

Josu Andoni Begoña Loiuko alkateak bere webgunean adierazi duenez, berritze-lanak egin dira Lauroetako pasealekuan. “Begiratokira ailegatu aurretik dauden hesiak hondatuta zeuden eta horregatik ipini ditugu berriak”, idatzi du. Hesietako zutabeak berritzeko lanek hilabete bat iraun dute, eta zutoinak aldatzeaz gain, zimendu berriak jarri dira.

Begoñaren hitzetan, hainbat auzotar ibili ohi dira pasealekutik, ariketa fisikoa eta korrika egiteko eta paseatzeko. Pasealekutik zehar La Peña begiratokira ailegatzen da. “Hori altxor handia da eta handik Loiu zein Txorierriko harana ikus daitezke”. Berritze-lanei esker, “ingurua eta pasealekua aisialdirako leku magikoa bihurtu ditugu loiuztar guztiek goza dezaten”.