Egutegiaren azalean 12 baserri batu dira. “Baserriak oso garrantzitsuak izan dira Loiun: Lastetxe, Orue, Marike-Bekoa... Batzuk desagertu dira, esate baterako, aireportuko lanen ondorioz”, esan digu Jesus Sustatxa elkarteko kideak. Baserriez gainera, beste argazki batzuk ere jaso dira: soldaduzkara joan ziren gazte batzuk, herriko umeak, dantzariak… Era berean, azken orrialdean Zamarripa auzoko argazki bat ipini da. “Berezia da argazkian Loiuren, Sondikaren eta Erandioren arteko topagunea azaltzen delako”.
Argazkiek herriaren bilakaera erakusten dute. Izan ere, egutegiko orrialde bakoitzean argazki bi jarri dituzte: bata, aspaldikoa; eta bestea, gaur egungoa. “Antzinako argazkia oinarritzat hartu dugu eta berria atera dugu. Ez da erraza izan, koronabirusa dela eta, oztopo handiak izan ditugulako. Baina eskertzekoa da loiuztarrek adierazi diguten jarrera eta laguntza”. Egutegiarekin batera, elkarteak DVD bat ere egin du. Horretan 2017an herrian antolatutako hainbat ekitaldiren laburpena jaso da: nekazaritza-azoka, bendejerei eginiko omenaldia, jubilatuen Gabonetako bazkaria…