Plana ahalik eta lasterren ezartzeko asmoa du udalak, “EAJren ustez, unea baita enplegua sortzeko, ekonomia suspertzeko eta pertsonen eta ongizatearen alde egiteko”. Horregatik, plana osoko bilkuran aurkeztu dute eta “aho batez” onartu da, “izan ere, proposamen sozialak eta talde ahulentzako laguntzak” jaso ditu.
Planaren 25 jarduera-ildo hurrengo hauek dira: gizarte-larrialdiko laguntzak indartzea, arrakala digitala txikitzea, adinekoentzako udal-programa, elikagaien bankurako laguntza handitzea, terrazei lotutako irizpideak malgutzea, gizarte-premietarako indartze-programak sustatzea, familia-kontziliaziorako plana, merkataritza eta ostalaritza bultzatzeko bonuak, adinekoentzako segurtasun- eta osasun-programa, terrazei lotutako zerga ez kobratzea, leku publikoetan jarduerak sustatzea, genero-indarkeria jasaten duten emakumeentzako programetara diru-partida handiagoa bideratzea, enplegu-plana, ibilgailuen gaineko zerga atzeratzea, hurbileko saltokien aldeko kanpaina, udal-emakidako lokalen alokairua ez kobratzea, kontratazio publikoan klausula sozialak ezartzea, loiuztarrak kontratatzeko laguntza-programa, herriko autonomoentzako eta ekintzaileentzako aholkularitza EGAZen bidez, herriko langabeak Lanbideren bidez kontratatzea, COVID-19a prebenitzeko eta kontrolatzeko inbertsioak, zergak eta prezio publikoak bere horretan uztea, ostalaritzarako laguntzak, gazteek etxebizitza alokatzeko diru-laguntzak eta, itxita dauden bitartean, tabernak eta jatetxeak zaborren tasa ordaintzetik salbuestea.