Izena ematea maiatzaren 12tik 19ra, 17:00etatik 21:00etara, egin beharko da udal-liburutegian edo Larrondoko frontoian. Landareak maiatzaren 22an banatuko dira 10:00etatik 11:00etara udaletxeko plazan, eta 11:30etik 12:30era Larrondoko Zentro Zibikoan. Balkoiak eta leihoak apaintzeko, bakarrik erabili ahalko dira udalak emandako loreak eta epaimahaiak, besteak beste, diseinua, originaltasuna eta koloreen bizitasuna hartuko ditu kontuan, bere erabakia hartzeko orduan. Epaimahaikoek ekainaren 30ean eta uztailaren 1ean aztertuko dituzte lore-apainketak.
Josu Andoni Begoña alkateak bere webgunean jaso ditu Mari Jose Mentxaka Hirigintza eta Ingurumen zinegotziaren hitzak: “Lehiaketaren helburua da bultzatzea gure udalerria lorez eta landarez apaintzea, horren onura estetikoaren balioa azpimarratzeko eta herria herritarrentzat zein bisitarientzat erakargarriago egiteko”. Beste xede bat da “loreek eskaintzen duten ekarpen artistikoaren bidez, herriaren ornamentazioa hobetzen laguntzea, eta, hortaz, ingurumenaren kalitatea areagotu”.