Aurrekontuen helburua da udalerria eraldatzea eta hobetzea, eta euren baitan 23 inbertsio egingo dira. Inbertsio horien artean daude udal-igerilekuak, auzoetako kirol- eta aisialdi-instalazioak, saneamendu-sareak hobetzea, kultura- eta jai-ekintzak berpiztea, bidegorriaren laugarren fasea, Erdi Aroko gaztelua Zabaloetxen, hondakinak batzeko zerbitzu berria, tokiko enpleguaren plana eta elkarteei diru-laguntza ematea.
Begoñaren hitzetan, udalaren gobernu-taldeak kudeaketa egokia egin du eta, hortaz, “udal-kutxa sendoak izanik aurre egin genion pandemiari, eta, orain, horren osteko egoerari ere egingo diogu aurre”. Era berean, adierazi du udalaren lehentasuna herritarren beharrizanei erantzutea dela eta horretarako diru-laguntza eta enplegu-plan gehiago egongo direla. Horri lotuta, esan du Denontzat elkartearen diru-laguntza % 33 handituko dela. Elkarte horrek herriko elikagaien bankua kudeatzen du eta, Begoñak azaldu moduan, eskari gehiago jasotzen ari da.