Josu Andoni Begoña Loiuko alkateak bere webgunean idatzi duenez, Gabonen ostean hasiko dira herriko gimnasioa eraikitzeko lanak. Loiun ez dago udal-gimnasiorik eta herritarrak alboko herrietako kirol-instalazioetara joan ohi dira. Hortaz, egitasmoak helburu bikoitza du: alde batetik, herritarren eskaerari erantzutea, eta bestetik, herritarren artean ohitura osasungarriak bultzatzea.
Udal-gimnasioa Zabaloetxeko frontoiaren ondoan altxatuko da eta beirate batek lotuko ditu eraikin biak. Gimnasioan hiru gune atonduko dira. Haietako batean fitness-a egiteko makinak ipiniko dira, eta beste gune batean, bizikletak. Hirugarrena erabilera anitzeko gunea izango da eta bertan zenbait kirol-ariketa egin ahalko dira, hala nola aerobica eta pilatesa.