Azokako ekintzarik handiena Orquesta Panoramaren saioa izan zen. Josu Andoni Begoña alkateak esan du Deia egunkarian herriak “egun historiko bat” bizi izan duela. “Ez da inoiz horrelako kontzertu bat Loiun egin; betiko gogoratuko da. Oso pozik gaude jendetza etorri delako, ia 15.000 lagun. Eta ez da istilu bat ere egon. Arrakastatsu-arrakastatsua izan da”. Galiziarrak lehendabiziko aldiz aritu dira Euskal Herrian eta ikuskizun ederra eskaini zuten.
Kontzertua alde batera utzita, asteburuan Loiun Erdi Aroan murgildu da: musikariak, trobalariak, soldaduak, artisauak, kortesanoak... Adin eta gustu guztietarako ekintzak egon dira: umeentzako jolasak eta ipuin-kontalariak, antzerkia, hegazti harrapariak, kalejirak, suzko malabarismoa… Orotara 35 postu ipini dira eta, besteak beste, artisauen lanak eta janaria ipini dira salgai. Lanbideen erakustaldiak ere egin dira. “Azoka osasuntsua eta zibikoa izan da”, esan du alkateak.