Begoñaren esanetan, Euskal Herriko Putxera Txapelketa da eta bertan 500 pertsona baino gehiago batu ohi dira. Gainera, azken ediziora 140 putxera aurkeztu ziren. “Jai-giroan egiten den hitzordu gastronomikoa da eta Loiuko eta Txorierriko lagunak ez ezik Euskal Herriko beste herri batzuetako lagunak ere erakartzen ditu. Baita kanpoko lagunak ere; adibidez, Burgosekoak eta Kantabriakoak”. Aipatu duenez, ekintzak bisitariak erakartzen ditu eta horrek eragin zuzena du bai herriko merkataritzan eta ostalaritzan, bai herriko bizitza sozialean. “Helburua da Loiu herri bizia eta aktiboa izatea, eta berton bizi izateko harro egon gaitezen”.
Guztira 3.800 euro banatuko dira saritan, eta garaikurrak, saskiak, txakolina eta ardoa ere banatuko dira. Bestalde, sailkapen orokorraz gainera, saria jasoko dute herriko parte-hartzaileek eta herrialde bakoitzeko putxerarik onenak. Izena ematea Larrondoko Zentro Zibikoan egin beharko da urtarrilaren 28an bertan, 09:00etatik 11:00etara, eta parte-hartzaile bakoitzak nahi beste putxera aurkeztu ahalko du; nolanahi ere, putxera bakoitzeko izen-emate bat egin beharko da. Osagaiei dagokienez, erabili beharko da indaba zuria, beltza edo pikarta, eta aukeran izango dira gainerako osagaiak, esaterako, txorizoa, mortzila, urdaia, azenario, saiheskia edo behi-hegala.
Eguna biribiltzeko, 16:30ean kontzertuak egongo dira eta 21:00etatik aurrera elektrotxaranga batek girotuko ditu Larrondoko txokoak. Azkenik, beste berrikuntza bat egongo da: gizarte-sareetara igotzen den txapelketako argazkirik onenak 100 euro jasoko ditu saritzat. Argazkiak #putxerasloiu hashtagak lagunduta igo behar dira gizarte-sareetara, eta antolatzaileek kontuan hartuko dituzte kalitatea, sormena, like-ak eta aipamenak. Argazkiak txapelketaren eguneko 23:59ak arte igo ahalko dira Facebookera, Instagramera eta Twitterrera.