Begoñaren esanetan, etxebizitza-arloan gazteak dituzte lehentasun. “Lanean gabiltza udalerrian etxebizitzak izateko eta gazteei independizatzen laguntzeko. Izan ere, urte hauetan etxebizitza gehiago eraiki ezin izateak ekarri du belaunaldien arteko erreleboa gero eta zailagoa izatea”. Azaldu duen moduan, Loiu sendotzeaz gainera, etxebizitza-plan berriak herriko merkataritza ere berpiztuko du. Sektorean 450 etxebizitza eraikitzeko asmoa dute, eta inguruan, besteak beste, berdeguneak eta pasealekuak atondu. Bestalde, aipatu beharra dago aurretik AENAk, AESAk eta ENAIREk ere etxebizitza-planaren aldeko txostenak egin zituztela.
Loiuko Etxebizitza Plana onartu du Aldundiak
Loiuk 7.000 biztanle baino gutxiago ditu eta, ondorioz, ezinbestekoa da Bizkaiko Foru Aldundiak haren etxebizitza plan partzialak onartzea. Hori dela eta, udalak Ariztondo-Txiline Sektoreko Plan Partziala bidali zion, hori aztertu zezan. Josu Andoni Begoña Loiuko alkateak jakinarazi zuenez, Aldundiak plana onartu du. “Oso albiste ona da, 25 urte badirelako udalerrian etxebizitzarik eraikitzen ez dela. Garrantzi handiko lorpena da Loiuko etorkizunerako, bizitegi-auzo berria sortuta udalerriaren fisionomia aldatuko du eta”.