Begoñaren hitzetan, Loiuko erdiguneko landak urtebetetzeak eta festak egiteko gune bihurtu dira azken hilabeteetan, eta “horretarako, txiki txokoa ipini da martxan”. Hori dela eta, “eta auzokideen eskariak kontuan hartuta”, ordenantza berria aho batez onartu zuten duela aste-pare bat. Ordenantzak arautzen ditu berdeguneen eta hiri-altzarien erabilera eta babesa.
Ordenantzan hainbat debeku zehaztu dira eta haien artean hauek daude: musika oso altu ipintzea, barbakoa eramangarriak erabiltzea, kanpatzea, animaliei eta landaretzari kalte egitea, gainerako herritarrei gunea erabiltzea oztopatzen dieten jarduerak egitea eta hiri-altzarietara igotzea. Nolanahi ere, udalak kartelak ipiniko ditu zer egin daitekeen eta zer ez azaltzeko. Arau-hausteak joko dira arintzat, larritzat eta oso larritzat, eta isunak 750 eurotik 3.000 eurora bitartekoak izango dira.