Motor-gidariek 11:00etan egingo dute ibilbidea. Ondoren, taberna-ibilbidea izango da, eta 15:00etan, paella-jana. Ohi moduan, jolas moteroak egingo dira 17:00etatik aurrera, eta 18:00etan drift erakustaldia egongo da. Opariak ere zozkatuko dira, eta eguna biribiltzeko, Malas Compañías taldeak kontzertua egingo du 20:00etatik aurrera.
Loiuko kontzentrazioa erabat finkatuta dago motozaleen egutegian. Iaz, esaterako, 200 motok egin zuten ibilaldia, eta 500 moto inguru batu ziren ekintzetan. Gerardo Izquierdo Txori Bikerseko kideak adierazi duenez, aurten ere zifra antzekoak egotea espero dute. Hala ere, azaldu du eguraldiaren arabera parte-hartzaileen kopurua aldatu ohi dela. Ibilbideari dagokionez, bestalde, Txorierritik eta Mungialdetik egingo dutela esan du. “Ibilbidea bigarren mailako errepideetatik egiten dugu beti, herrietan oztoporik ez sortzeko. Gainera, segurtasun-neurriez arduratzen gara bereziki, eta bidegurutzeetan-eta arduradunak ditugu, arazorik egon ez dadin”.
Kontzentrazioa Larrondora eraman zuten atzo, baina aurten bere ohiko kokalekura itzuliko da, Zabaloetxera hain zuzen. Esan moduan, hitzordu garrantzitsua eta arrakastatsua da Loiuko motorren kontzentrazioa, eta Izquierdoren esanetan, baditu bereizgarri batzuk. “Adibidez, paella izaten dugu bazkarirako, eta paella lekuan bertan egiten dute sukaldariak diren lagun batzuek. Era berean, jendeari asko gustatzen zaizkio joko moteroak, eta Loiun drift erakustaldia dugu, oso leku gutxitan egiten dena”. Izquierdok eskerrak eman dizkie kontzentrazioa antolatzen lagundu dieten guztiei.