Bigarren zubi bat ezartzen dabiltza URA ur agentziakoak Asuako Sangroiz auzoan, eta habeak atzo bertan ezarri zituzten. Egitura hau Asua ibaiaren bideratze-lanak direla eta eraikitzen dabiltza eta helburu nagusia ibaiak gaitasun hidrauliko handiagoa izatea da, uholdeak egonez gero zonaldeko etxebizitzak eta industriak babesteko. “Aurreko bideratzea egoera tamalgarrian zegoen eta egitura oso ahula zeukan”, azaldu dute URAkoek. “Denbora tarte honetan ezbeharrik egon izan balitz, kolapsoak eragin oso negatiboa izango zukeen aurreko egiturarekin”.
Zubi berria Asua ibaiaren 15 metroko zabalera berrira doitu da eta Sangroizko zubiaren eta Industrias Alba enpresaren artean ezarri dute. Pasa den ekainean lehen zubia eraiki zuten, ibaiaren bideratze lanak egiten zituzten bitartean Sangroiz industriagunerako sarbidea ezartzearren.
Bideratze-lanen zati handi bat dagoeneko bukatuta dago, URAk adierazi duenez, eta lanek ez dutela inolako eraginik izan ubidearen ohean azaldu dute. Berez, lanak lurra baztertzen eta ibaiertzetan egin direla esan du enpresak.
