Sondikako Udalak gizarte-sareen bidez jakinarazi duenez, atzo prentsaurrekoa egin zuen Bilboko Udalarekin batera, azaltzeko “merkatuari galdetzeko prest daudela Artxandako Aktibazio Planaren barruan lehen emakiden lizitazioa planifikatzeko “. Kontsulta hiru guneri buruzkoa izango da: Santo Domingo, Pike Bidea eta Bagatza Bidea. Leku horietan jarduera bereiziko proiektuak ipini nahi dituzte martxan, “aisialdi estentsiboarekin eta jasangarriarekin lotuta, eta kalitateko enplegua sortzea ahalbidetuko dutenak”. Kontsultaren emaitzak aztertu ondoren, “gune horiek kontzesiora ateratzea izango da hurrengo urratsa, eta espero dugu hori datorren urtearen hasieran egitea”.
Santo Domingo gunea
331.593 metro koadroko azalera du. Ingurune naturalaren ezagutza sustatzeko, proposatu da bertan aisialdi pedagogikoari eta ludikoari eta umeen aisialdiari lotutako jardueren zentro bat ipintzea.
Pike gunea
54.814 metro koadroko lursaila da. Han familientzako gunea ipintzeko proposamena egin da abentura- eta aisialdi-jarduerak egiteko.
Bagatza gunea
73.145 metroko azalera du. Proposamena da bertan jarduera-gune bat atontzea, aire zabalean intentsitate handiko kirola egiteko.