Asteburu honetarako Bizkaian aurreikusitako tenperatura altuen aurrean, eta San Juan jaiak hastearekin batera, Sondikako Udalak prebentzio-neurri batzuk jarri ditu abian, programatutako jardueretan parte hartuko duten pertsonen segurtasuna eta ongizatea bermatzeko.
Igandean, jaietan jende dexente pilatuko duten jarduerak aurreikusten dituzte, horregatik, Sondikako Udalak prebentzio baliabideak indartzea erabaki du. Hala, anbulantzia bat kontratatuko du, eta arratsaldeko 20:00ak arte eskainiko du zerbitzua, gerta litekeen edozein gorabeherari erantzuteko. Era berean, karpa inguruan ur-hartune bat jarriko dute, “behar izanez gero ingurua freskatu ahal izateko, beroaren ondorioak arintzeko neurri osagarri gisa”.
Prebentzio neurri osagarri gisa, hasiera batean karpan egitekoa zen Gorantzaileak taldearen dantza erakustaldia Gorondaganeko estalitako patiora lekualdatu dute. “Espazio horrek baldintza termiko hobeak eskaintzen ditu eta bero gutxiago metatzen du, jarduera baldintza erosoagoetan garatzea ahalbidetuz, bai dantzarientzat bai ikusleentzat”.
Udalak gogorarazi du prebentzioa eta norberaren ardura funtsezkoak direla bero handiko egoeren aurrean. Horregatik, herritar guztiak Eusko Jaurlaritzako Osasun Sailak zabaldutako gomendioak jarraitzera gonbidatzen ditu, bereziki adinekoen, haurren, gaixotasun kronikoak dituzten pertsonen eta kalteberatasun egoeran dauden kolektiboen kasuan.
“San Juan jaiak pertsona guztientzako giro seguru eta atseginean garatzea nahi dugu. Hori dela eta, asteburu honetarako aurreikusitako prebentzio neurriak indartu ditugu, eta herritarrei dei egiten diegu jaietako programazioaz goza dezaten, beroari aurre egiteko osasun gomendioei jarraituz”, adierazi du Naia Landa Sondikako alkateak.