Bilboko txotxongilo-jaialdia, Txorierrin

Bilboko Nazioarteko Txotxongilo Jaialdia azaroaren 21etik 29ra bitartean egingo da. Aurreko urteetan bezala, jaialdiak Txorierri ere bisitatuko du. Jordi Beltran konpainia kataluniarrak Antologia ikuskizuna aurkeztuko du azaroaren 27an, 18:30ean, Lezamako Kultur Aretoan, Lezama Bizirik eta Oxangoiti elkarteen eskutik. Saio hori Larrabetzun ere izango dute ikusgai, azaroaren 29an, 19:00etan, Hori Bai gaztetxean, herriko Kulturbilguneak bultzatuta.

Jordi Beltran nazioarteko marioneta manipulatzaile onenetako bat da. Antologia saioa bere opera prima da eta 1987an estreinatu zen. Eta oraindik ere taularatzen jarraitzen da. Zazpi eszenak osatzen dute Ikuskizuna eta horietan musika eta antzerkia uztartzen dira.

Orain dela lau urte, jaialdiaren zuzendariek hura Bizkaiko herrietara zabaltzea erabaki zuten. Txorierriko herriei eskaintza egin zieten eta Larrabetzuk eta Lezamak onartu zuten hori. Beste alde batetik, jaialdiaren gainerako egitaraua Areatzan, Arrigorriagan, eta, batez ere, Bilbon egingo da, Campos Eliseos Antzokian, Harrobia Eskena eta Pabellon 6 aretoetan, Errekalde eta Deustuko udaltegietan eta Arriaga Antzokiaren alboan. Txotxongilo-saioez aparte, “Erakusgarri botoi bat” mintegia eta “Objetuekin jolastera goaz” tailerra ere antolatu dira.

 

Informazio gehiago:

www.bilbaotxfest.org