Ekintzak eta elkarretaratzeak, indarkeria matxista gaitzesteko

Atzo, azaroak 25, Emakumeen Aurkako Indarkeria Ezabatzeko Nazioarteko Eguna izan zen. Aurten pandemiak aldarrikatze-ekitaldiak baldintzatu dituen arren, talde feministek eta erakundeek deituta, ekintzak eta elkarretaratzeak egin ziren hiriburuetan eta herritan, indarkeria matxista gaitzesteko eta emakume guztientzat bortizkeriarik gabeko bizitza aldarrikatzeko. Baita Txorierrin ere. Esate baterako, Zapata Gorriak Zamudioko talde feministak antolatuta, emakumeek osatutako giza kate bat herriko kaleetatik ibili zen, eta, ondoren, ekintza egin zuten Leizaola plazan.

Bestalde, Koxak Derioko talde feministak errebindikazio-esaldiak eta bandera feministak zabaldu zituen hutsik zegoen herriko plazan  eta irudia gizarte-sareetara igo zuen. Larrabetzun eta Lezaman elkarretaratzeak egin ziren, besteak beste, Zutunik (Larrabetzu) eta Moreak (Lezama) talde feministak deituta. Garrasia Sondikako talde feministak ere bideo bat grabatu zuen eta gizarte-sareetan zabaldu zuen. Horretan, indarkeria matxista jasaten duten emakumeak omentzeaz gainera, sororitate-gunea aldarrikatu dute. “Ulertu behar dugu emakume guztiok batuta egon behar dugula, eta, aldi berean, sistema matxistaren menpean egoteak dakarren oztopoa ikusgai egin”, idatzi dute gizarte-sareetan.