“Plazaren egoera ez da lehen bezalakoa. Azken hilabeteotan asko sufritu du bertsolaritzak, eta apurka-apurka egoera bere onera etortzen ari da. Saioak oso baldintzatuta egin dira eta orain aztertzen gabiltza plazak zuen dinamismoa zelan berreskuratu, hau da, egoera berrira egokitzen ari gara. Txapelketak garrantzitsuak dira, baina asteroko plaza landu behar da, bertsolaritzaren hauspoa baita”, adierazi du Gontzal Agotek, Euskal Herriko Bertsozale Elkarteko Lehendakaritza Taldeko kideak.
Finala, Iruñean
Azken txapelketa 2017an jokatu zen Barakaldon eta Maialen Lujanbio izan zen txapelduna. Aurten, aldiz, beste herri batera eraman dute azkeneko saioa. “Ibiltaria da Bertsolari Txapelketa Nagusia. Euskal Herrian zehar, herrialdez herrialde, herriz herri, eragitea eta bertsolaritza sustatzea da Bertsozale Elkartearen helburua. Ondorioak nabariak izan ohi dira: zaletasuna areagotzen da, bertso-eskolentzat bizigarri dira eta ilusio piztaile da tokian tokiko bertsogintzan”. Antolatzaileek bertsolaritza Nafarroan sustatzea nahi dute eta, horren haritik, bertako Gobernuak 2018an bertsolaritza Kultur Intereseko Ondasun izendatu zuen.