Azaldutakoaren arabera, Azokaren helburu nagusia da bisitari eta kulturzale guztien segurtasuna bermatzea, eta horretarako, osasun-neurriak indartuko dituzte 56. edizioari begira. Hortaz, Landako Gunera eta Ahotseneako kontzertuetara sartzeko, ezinbestekoa izango da aldez aurretik izena ematea. Hori Azokaren webgunean sortuko den erreserba-sistema baten bidez egin beharko da. Egunero ordu eta erdiko bost txanda, 10:00:00etatik 20:00ak arte, egongo dira Landako Gunera sartzeko eta bakoitzean 1.200 bisitari izango dira.
Bestalde, esandako webgunean ere eman beharko da izena Ahotseneako kontzertuetara joan ahal izateko. Orotara 50 kontzertu antolatu dira. Plateruena kafe antzokian ez da ostalaritza-zerbitzurik egongo eta ezin izango da edaririk edo jatekorik hartu. Ezta Landako Gunean ere. Gune bietan derrigorrezkoa izango da maskara erabiltzea.
Gerediaga elkarteak eta Durangoko Udalak erantzukizunez eta arduraz jokatzeko deia egin diete kulturzale guztiei eta nabarmendu dute osasun-neurriak zorroztasunez betearaziko direla.