Jakinarazitakoaren arabera, kontratatutako 433 pertsonaren % 12ri lanaldi osoko kontratu mugagabea egin diete. Iaz 5.156 pertsonak jo zuten EGAZ Txorierrira eta haietako 3.904 erabiltzaile berriak izan ziren. Bestalde, 20 urtetik 44 urtera bitarteko 68 txorierritarrek hartu zuten Hazilan programan parte, eta lanean txertatze-indizea % 70ekoa izan zen. Hazilan programaren helburua da parte-hartzaileen gaitasun pertsonalak eta profesionalak bultzatzea. Era berean, eskualdetako hainbat sektoretako enpresekin lankidetzan, prestakuntza-saioak ere antolatu zituen iaz EGAZek, baita ideia-lehiaketa ere, non 30 ekintzailek hartu baitzuten parte.
EGAZ Txorierriren eta beste erakunde batzuen arteko sinergiei esker 28 lagun kontratatu dira Txorierriko Udalen eta Lanbideren kontrataziorako laguntza-programen baitan, eta txorierritar bik eskuratu dute Gobal Trainining nazioarteko beka. Horrezaz gainera, 16 urtetik 18 urtera bitarteko 254 gaztek eman zuten Ezagutu Aukeratzeko programan izena, lan-etorkizunari begira zuten zalantzak argitzeko asmoz.
Enpresei dagokienez, EGAZek lagundu du 55 enpresa-proiektu garatzen. Proiektu horietatik 33 ipini dira martxan eta 55 lanpostu sortu dira. Guztira 1.433.160 euroko inbertsioa egin dute sustatzaileak, eta 939.950 euroko dirulaguntza jaso. Eskualdeko enpresen lehiakortasuna bultzatzeko ekintzak ere egin dira, hala nola nazioartekotzea sustatzeko topaketak eta webinarrak, eta berrikuntzari lotutako proiektuak.