Larrabetzuko eta Lezamako batzokietan armada errusiarraren alde egindako pintadak gaitzetsi ditu BBBk

Bizkaiko Buru Batzarrak prentsa-ohar baten bidez jakinarazi duenez, goizaldean Z hizkia eta igitaia eta mailua margotu dituzte Larrabetzuko, Lezamako, Lemoako eta Zeberioko batzokietan. Pintadek adierazten dute armada errusiarraren aldeko babesa, eta aurreko astean Loiuko eta Armintzako jeltzaleen egoitzetan ere egin zituzten. “Errusiarren aldeko pintada-boladaren aurrean, Bizkai Buru Batzarrak erabat eta sendotasun osoz gaitzetsi nahi ditu ekintza zarpail eta bandaliko hauek, justifikaziorik gabekoak eta Ukrainiatik Euskadira iritsi diren errefuxiatuen oinarrizko eskubideen eta giza duintasunaren aurka egiten dutenak”.

“Gainera, jarduera ulertezin hauek agerian uzten dute egileen zitalkeria eta eskrupulorik eza, Europan gertatzen ari den drama erraldoiaren aurrean”, adierazi dute. Bestalde, esan dute EAJren Bizkaiko exekutibak jarraituko duela giza eskubideak urratzen dituen ekintza oro salatzen. “Eta gogoratzen jarraituko dugu gutxiengo batek egindako jarduerek eta pintadek ezin dutela ezabatu gizartearen gehiengoak gerra arbuiatzen duela. Oraindik ere ezin dugu ulertu eraso ulertezin hauen egileak Putinek ekarri duen gerra babestera zerk bultzatu ditzakeen. Erabat deitoragarria da gutxiengo bat Ukrainako inbasio militarra justifikatzen saiatzea, eta are gaitzesgarria da euren pintaden bidez biktimak berriz biktima bihurtu nahi izatea. Gehienak emakumeak eta haurrak dira, bizirik jarraitzeko, euren herrialdetik eta etxetik ihes egin behar izan zutenak”.  



Txorierriko albiste garrantzitsuak eta azken ordukoak jaso gura dituzu Whatsapp bitartez?

WHATSAPP: Bidali ALTA hitza 747 406 561 telefono zenbakira.

Izan zaitez berriemale ere. Bidali zure argazkiak, bideoak eta berriak.

Hilero lagun birentzako bazkaria zozkatuko dugu alta hartzen dutenen artean (Baserri Antzokian).