Bestalde, baterako adierazpenean jaso duten moduan, “gaitzespenik irmoena adierazi nahi dugu eraso matxistaren aurrean, eta babes eta elkartasun osoa adierazi nahi diegu erasoa jasan zuten emakumeei”. Era berean, argi eta agi utzi dute ez dutela emakumeen aurkako inolako indarkeriarik onartzen. “Emakumeak kontrolpean eta mendean izan nahi dituzten jarrera eta ideia matxista oro arbuiatzen ditugu”. Euren hitzetan, Sondikan gertatutako ez da kasu isolatua, sistema baten ondorioa baizik. “Herritar guztiei indarkeria matxistaren aurrean zero tolerantzia izan dezatela eskatzen diegu. Indarkeria matxistarekin amaitzea guztion ardura eta erantzukizuna da. Gogorarazi nahi dugu emakumeok eskubidea dugula jaiez beldurrik gabe gozatzeko, eta une oro, seguru sentitzeko. Horrelako jokaerek ez dute lekurik gure udalerrian”.
Pintadak Lezaman
Beste aldetik, Lezamako sarreretan dauden indarkeria matxistaren kontrako paneletan zakilak pintatu dituzte. “Ozenki diogu ez dugula Lezaman horrelako erasoak onartuko eta oraindino ozenago diogu nahiz eta batzuei ez gustatu indarkeria matxistarik gabeko Lezama baten alde lanean jarraituko dugula. Matxiruloak kanpora!”, adierazi du Moreak Lezamako talde feministak pintadak gaitzesteko.