Horretarako, ibilbidea hiru eguneko epean bete beharko dute, bi geldialdi eginez. Aurreratu dutenez, bidearen lehenengo zatia Urepeletik Auritzeraino izango da. Gazteek bertan pasako dute lehenengo gaua. Hurrengo goizean, Zubiri aldera abiatuko dira bigarren gaua bertan igarotzeko. Ekainaren 13an martxaren azkeneko zatiari ekingo diote, Iruñeraino. “Dinamikaren helburu nagusia gazte euskaltzaleen konpromisoa indartzea eta euskararen aldeko pizkundea sustatzen jarraitzea da”, azaldu dute.
Gazte Euskaltzaleen Sareak, ‘Gazte euskaltzaleok bidea urratu’ dinamikaren baitan antolatu dute, eta helburu dute Euskalgintzaren Kontseiluak deitutako Euskaltzaleon Martxarekin bat egitea.