150 urte dira foruak deuseztu zituztenetik eta mende erdi Bergaran Alkateen Mugimendua abiatu zutenetik, eta, bi efemerideak gogoan hartzeko, 200 udal ordezkari baino gehiago batuko dira domekan, uztailak 19, Bergaran bertan, udalak eta Gipuzkoako Foru Aldundiak antolatutako ekitaldi instituzional batean. Ekitaldiak “karga sinboliko handia” izango duela azaldu dute eta “iragana, oraina eta etorkizuna” lotuko dituela musikaren eta dantzaren bitartez.
Bai foruen abolizioak, baita Alkateen Mugimenduak ere “sakon markatu dute euskal gizartearen antolaketa instituzionala eta autogobernuaren bilakaera”. 1976ko udal ordezkarien “ekarpena” oroitzeaz harago, “etorkizunari begirako konpromisoak partekatzeko eta Euskal Herriaren eskubide historikoen inguruko eztabaida berritzeko topagune” izatea nahi dute.