Zapata Gorriak Zamudioko talde feministak ekintzak antolatu ditu Emakumeen Nazioarteko Eguna dela eta. Horrela, bada, gune feminista atonduko dute herriko zenbait txokotan. Azaldu dutenez, bertan emakumeen aldarrikapen historikoak erakusgai ipiniko dituzte, eta “mezuen gunea” sortu. “Herriko kirol-, kultura- zein gizarte-taldeei eskatu diegu bertaratzeko eta mezua jartzeko, baita talde politikoei ere”.
Gune feminista martxoaren 4an, 18:00etatik 20:00etara, izango da Lehendakari Agirre plazan; eta martxoaren 5ean, leku berean, 11:00etatik 14:00etara. Bestalde, martxoaren 8an, Leizaola plazan ipiniko dute 18:00etatik 20:00etara. Gune feministan “Zamudio feminista” ikurrak banatuko dira eta “Feminismoa eraikitzen” mezua idatziko da adreilu batean. Hori herriko denda, zerbitzu eta tabernetara eramango da, ikusgai ipini dezaten.
Martxoaren 8an, kontzentrazio-manifestaldia egingo dute 19:00etan Leizaola plazan hasita, eta martxoaren 22an “El debate sobre la prostitución en el feminismo” hitzaldia egongo da Teresa Maldonadoren eskutik, 19:00etan, Zamudiotorren.
