Atsotitzak honela dio: “Bi ezkero, hiru seguru”. Pandemia dela eta, Bizkaiko Dantzarien Eguna bi urtean bertan behera utzi ondoren, aurten maiatzaren 15ean egingo da Zamudion. Hiru Bat dantza taldea anfitrioia izango da eta, azaldu dutenez, gogotsu dabiltza. “Hainbeste denbora itxaron ostean, ia ez dugu sinesten. Ilusio handia dugu. Espero dezagun dena ondo ateratzea eta dantzarien eguna ahalik eta normaltasun handienaz ospatu ahal izatea”.
Goizean, Bizkaia osotik etorritako dantzariak Uribe plazan batuko dira eta handik kalejiran irtengo dira Zamudioko futbol-zelairaino. Bertan dantzen agerraldia egingo dute. Ondoren, herrigunera itzuliko dira bazkaltzera eta arratsaldean erromeria egongo da.
Aurreko urteetan, 2.000 dantzari inguru batu ohi izan dira Bizkaiko Dantzarien Egunean, baina parte-hartzaileen kopurua aldatu daiteke aurten, pandemiak dantza-taldeetan izan duen eragina dela eta. Nolanahi ere, dantzariek gogotsu helduko diote hitzorduari eta euren egun handia disfrutatuko dute.
