“Zortea izan dut. Ez nuen aurten argazkirik bidaltzeko asmorik, baina azkenean zerbait bidaltzea erabaki nuen eta emaitza ezin hobea izan da. Pentsatzen nuen beste argazkiak nireak baino politagoak izango zirela, baina azkenean nirea aukeratu dute. Oso hunkigarria izan zen, batez ere saria argazkilariek eurek ematen dutelako. Horrek esan nahi du lan onak direla”, esan digu Zamudioko argazkilariak.
Apezetxeak Bilboko Arenalean, Arriaga Antzokiaren aurrean, egin zuen argazki irabazlea. Zuri-beltzez atera zuen eta bertan hurrengo eszena dago ikusgai: kaleko mimo artista bat, Jesu Kristo jantzita eta gurutzea lepoan duela; bere atzean, mutil gazte bat keinuka dabil; eta aurrean, gizon nagusiak begiratzen die mutil biri. “Argazkian hiru garai harrapatu ditut: Jesu kristo, agurea eta gaztea. Bitxia iruditu zitzaidan”.
Apezetxeak “grafiko” atalean irabazi du saria. Horrezaz gainera, beste bost kategoria daude: erretratua, ezkontzak, haurrak, jaun-hartzeak eta gai librea. Eta bakoitzean, epaimahaiak 10 argazki aukeratzen ditu. Goya sariek hainbat aldiz hartu dute kontuan Apezetxearen lana. Izan ere, 2013an industria-publizitate kategorian irabazi zuen. Gainera, zortzi aldiz izendatu dute hautagai. Sariak banatzeko gala lehen astean izan zen Zaragozan.