Zein da zure alderdiak datorren lau urteei begira Deriorentzat daukan proiektua?
Argi daukagu herritar guztientzat bizitza kalitaterik hoberena nahi dugula, eta horretan arituko garela datorren lau urteetan. Helburu hori nagusi, derioztarren beharrizanak eta ekarpenak zeintzuk diren jakiteko, hileak eman ditugu herriko elkarte eta gizarte eragile ezberdinekin batzarrak izaten. Jasotako proposamen eta ekarpen horiek osatuko dute datorren lau urteetarako proiektua, izan ere, denon artean eginiko egitasmoa izatea nahi dugu, hori baita Derio hazi arazteko modurik onena. Derioztarrak arduratzen dituzten arloetan jarriko dugu arreta: enplegu, ekonomia, kultura-euskara eta gizarte zerbitzuetan, besteak beste.
Beraz, parte-hartzearen aldeko apustua egin duzue, ezta?
Hala da. Parte-hartze erreala bultzatuko dugu eta Udala herritarrei hurbilduko diegu. Hasi dugun parte-hartze prozesu hau ez da bertan behera geldituko, datorren urteetan, jendeak esan nahi duena entzuten jarraituko dugulako. Horretarako batzarrak mantentzeaz gain, argi daukagu udaletxetik kalera irten behar dugula, hurbildu, eta derioztar guztiek, baita desilusio politiko bizia duten gazteek ere, esan beharrekoa entzun. Hori izango da nire eta nire lantaldearen datorren urteetako erronka: pertsona hurbila izatea eta inork ez dezala izan nigana etortzeko erreparorik.
Gazteak aipatu dituzu, zein da gazteriari begira jarraituko duzuen lan ildoa?
Herri bezala aurrera egin nahi badugu, era argi batean egin beharko dugu gazteen aldeko apustua. Haiengana hurbildu, entzun, babesa eman eta parte hartzaile izateko bideak eskaini, haiekin batera eraiki nahi baitugu etorkizuna. Helburu horiekin, besteak beste, gazteekiko harremanak areagotu egingo ditugu whatsapp-a, gizarte sareak, eta abar erabiliz; gazteentzat eginiko jarduerak planifikatzeko eta garatzeko orduan, euren parte hartzea bultzatuko dugu; gazteguneak mantendu eta hobetuko ditugu. Ezinbestekoa da lonjak kalera ateratzea.
Nolako lantaldea izango da zurea? Zer esan ahal diguzu zure kideei buruz?
Azpimarratzekoa da, taldearen % 60 emakumeek osatzen dugula. Talde heterogeneoa da, derioztarrak danak, gaztetasuna eta esperientzia uztartzen dituena, oso prestatua, euskalduna eta garrantzitsuena dena, beren herri eta herrikideen alde lan egiteko gogo eta ilusio handiarekin.
Karguaz jabetu, eta zer da egingo duzun lehenengo gauza?
Argi daukat: derioztarrengatik eta derioztarrentzat lanean hasi.
Hurbiletik
Esther Apraiz, 39 urteko energiaz betetako emakume jeltzalea da eta bere herria derioztar guztiekin batera hazi arazteko aurkeztu du bere burua alkategai. Zuzenbide Ekonomikoan lizentziatua, lehen eskutik ezagutzen du udal bizitza zer den, izan ere, gaur egun Bilboko Udaleko Hirigintzako Lege sekzioko burua da eta azken urteotan zinegotzi aritu da, Hirigintza eta Hezkuntza sailetan, Derioko Udalean. Hurbiltasuna, zintzotasuna eta lan taldean aritzeko gaitasuna dira derioztar honen ezaugarrietariko batzuk. Horregatik, erraz aurki dezakegu familiarekin eta lagunekin herrian paseoan.