Lehiaketan 75 lagunek hartu zuten parte eta guztira 216 argazki aurkeztu zituzten, parte-hartzaile bakoitzak hiru lan aurkezteko aukera zuen eta. Lehiaketa Concursos Digitales izeneko plataformaren bidez kudeatu zuten eta, horregatik, Euskal Herritik kanpoko hainbat argazkilarik aurkeztu zituzten lanak Derioko txapelketara. Hau da parte-hartzaileen jatorria: Derio, 10 lagun; Txorierriko gainerako herriak, hiru; Bizkaiko beste herri batzuk, 17; Euskal Herriko gainerako herrialdeak, 20; Estatua, 16; eta Estatutik kanpo, bederatzi.
Antolatzaileek lehiaketaren hamabigarren edizioan zehaztu zuten lehen aldiz haren gaia: natura. Epaimahaia Juan Ramon Larrocea eta Pablo Freijo bilbotarrek eta Jon Rueda zamudioztarrak osatu zuten, eta irabazleen izenak azaroan ezagutarazi zituzten. Sari-banaketa ere azaroan egin zen eta argazkirik onenak urtarrilera arte egon dira ikusgai Kultur Birikan. DATen lehiaketak gero eta ospe handiagoa du. Izan ere, hiru parte-hartzailerik onenek Argizaiola lehiaketan parte hartzeko gonbidapena lortzen dute.