Horrela, bada, enpresak lantegia ixteko asmoa adierazi zuenean langileek greba mugagabea hasi zuten eta, euren esanetan, egun horretan bertan lan-materialez betetako kamioi bat ailegatu zen. Gainera, azaldu dute iaz lanari lotutako malgutasun-orduak egin zituztela pandemiaren ondorioz galdutako lana berreskuratzeko. Bestalde, enpresa-batzordearen ordezkariek esandakoaren arabera, enpresaren asmoa da langileak maiatza edo ekaina aldera kaleratzea, “baina bitartean eskaerak aurrera ateratzen”. Langileek euren lanpostuei eusteko eskatu diote multinazionalari eta gogora ekarri dute 2016an langilerik gazteenak eta zaharrenak kaleratu zituztela. “Langileon bataz besteko adina 55 urtekoa da eta oso zail izango dugu beste enplegu bat eskuratzea”.
Langileak Bizkaiko Batzar Nagusietako eta Txorierriko Mankomunitateko ordezkariekin biltzekoak ziren gaur. Era berean, espero dute Eusko Jaurlaritzarekin batu ahal izatea eta horrek gatazkan bitarteko izatea.
