Emaus Gizarte Fundazioa

Gabon solidarioak

Derion pasatu ditugun lehen Gabonetan jarduera komunitarioa eta solidarioa egin dugu: jostailuak batu eta banatzea. Helburua izan da herritarrek egoera onean zeuden jostailuak ematea, hala eskatu zuten lagunen eta laguntza humanitarioko elkarteen artean banatzeko. Egitasmoa aurrera eramateko, kontaktuan ipini ginen Alazne Prietorekin. Gazte derioztarrak aurreko urteetan ere jostailuak batzeko kanpaina antolatu zuen udalarekin batera, eta oraingo honetan hirurok elkarlanean ibili gara egitasmoari heltzeko.  

Jostailuak azaroaren 29tik abenduaren 12ra arte jaso genituen Kultur Birikan. Bertara derioztarrak ez ezik inguruko herrietako biztanleak ere hurbildu ziren eta hainbat adin-tartetako umeentzako jostailuak ekarri zizkiguten. Gure lana jostailuak desinfektatzea eta sailkatzea izan zen. Zabalkunde handia eman zitzaion lehenengo fase honi, eta, hortaz, dozenaka herritarrek eta Txorierriko Institutuko ordezkariek ere ekarri zizkiguten ehunka jostailu. Izatez, hain jostailu-kopuru handia jaso genuen, ezen Kultur Birikan uste baino leku handiagoa hartu behar izan baikenuen.

Ondoren, bigarren faseari ekin genion. Jostailuak Kultur Birikan banatu genituen abenduaren 12tik 22ra bitartean. Derioko eta Bilboko familia batzuk etorri ziren jostailu bila, baita Afrikara laguntza bidaltzen duten elkarte batzuk ere. Alde batetik, Hamadako Izarrak elkartearekin izan ginen harremanetan. Elkarte horretako kideek Saharako umeekin egiten dute lan eta jostailu asko eraman zituzten Aljeriako kanpamendu sahararretara bidaltzeko. Beste aldetik, Novisi elkarteak industria-furgoneta bat bete zuen jostailuz, bizikletaz, baloiz eta umetxoak eramateko orgaz, Togora bidaltzeko. Azkenik, Zamudioko bizilagun batek hainbat jostailuz betetako paketea eraman zuen, bere jaioterrira, Togora bidaltzeko.

Aipatutako guztiak oso eskertuta azaldu ziren Alazne Prietok, Derioko Udalak era Emanus Gizarte Fundazioak elkarlanean egin dugun egitasmoagatik. Esan beharra dago PAI Bitarteneko eguneko egoitzan egunero gabiltzanontzat ere oso ekintza interesgarria eta aberasgarria izan dela, harreman zuzena izan dugulako Kultur Birikara jostailuak ekartzera zein hartzera etorri diren pertsona guztiekin. Era berean, Gabonak oso garai berezia direla kontuan hartuta, poz-pozik utzi gaitu herritarrek egitasmoari nola erantzun dioten ikusteak.

Esanak esan, PAI Bitartean programaren kideok eskerrak eman nahi dizkiegu ekimenean parte hartu duten guztiei. Amaitzeko, gogora ekarri nahi dugu datorren Gabonetan ere ekintza antolatuko dugula: espero dugu askoz jostailu gehiago batzea, inguruko zein beste herri batzuetako jende gehiagorengana ailegatu ahal izateko.    

Txorierriko albiste garrantzitsuak eta azken ordukoak jaso gura dituzu Whatsapp bitartez?

WHATSAPP: Bidali ALTA hitza 747 406 561 telefono zenbakira.

Izan zaitez berriemale ere. Bidali zure argazkiak, bideoak eta berriak.

Hilero lagun birentzako bazkaria zozkatuko dugu alta hartzen dutenen artean (Baserri Antzokian).