Almere taldeak hirugarren postuan bukatu zuen Herbehereetako Bigarren Mailako Liga eta horri esker, igoera lortzeko kanporaketak jokatu ditu. Lehenengoan, Eindhoven taldeari irabazi zion; bigarrenean, VVV-Venlo taldeari; eta hirugarrenean, Emmen taldeari. Almere City Herbehereetako talderik gazteena da; eta Almere, herrialdeko herririk gazteena. Taldeak lehendabiziko aldiz jokatuko du Herbehereetako Lehenengo Mailan, herrialdeko erraldoien kontra: Feyenoord, Ajax eta PSV. Igoera ospatzeko, 6.000 zaletu atera ziren kaleetara.
Peña iaz joan zen Holanda aldera. Derioztarrak 31 urte ditu eta eskarmentu handia du Espainiako Bigarren mailan, hainbat taldetan ibili delako eta guztira 400 partida jokatu dituelako profesional mailan: Albacete, Mirandes, Racing, Lugo, Alcorcon eta Amorebieta. Gainera, 2012an debuta egin zuen Athletic taldean. Aurten, 31 partida jokatu ditu Almere taldearekin; bost gol sartu ditu eta asistentzia bat banatu. Martxoan klub holandarrak iragarri zuen Peñak urtebete gehiago jarraituko zuela bertan.