Zapatuan, goizetik hasita, bertoko produktuen azoka eta perretxikoen erakusketa egongo dira eta janari postuak ere ipiniko dituzte, hala nola taloa, txakolina, sagardoa eta pastela. Eguerdiko 12etan euskal dantzak izango dira, eta Derioko Miragarri taldeak dantza-erakustaldia egingo du 13:30ean. Bestalde, umeentzako perkusio-tailerra egingo da 15:00etan, eta 17:00etan kontzertua izango da Entzi eta Otsoa musikarien eskutik.
Domeka pedalei eraginez hasiko da. Izan ere, 11:00etan, eta Gela Pedagogikoaren eskutik, sei kilometroko ibilbidea egingo da bizikletan. Baserri Antzokitik atera, eta Deriotik paseoa eman ostean Baserri Antzokira itzuliko da. Helmugan hamaiketakoa egongo da parte-hartzaileentzat. Azkenik, 13:00etan, zozketa bereziak izango dira.