SADeko langileek komunikatu bat irakurri zuten. Haren bidez azaldu zuten moduan, ia urtebete daramate borrokan euren lan-baldintzen hobetzeko, “eta apirilean erabateko prekarietatera eramaten gaituen hitzarmena sinatu zen arren, ez dugu amore emango”. Langileen esanetan, azken 10 urteetan bakarrik 30 euroko soldata-igoera izan dute, eta zerbitzua emateko euren autoa erabili behar dute; horrek 1.300-1.500 euroko gastua ekartzen die urtean. Horrezaz gainera, adierazi dute, besteak beste, ordu erdiko zerbitzuak ere ematen direla, senideei eta zaintzaileei ez zaiela atsedena hartzeko ordurik eskaintzen eta kasuak ez direla guneka antolatzen.
SADeko langileek Txorierriko Zerbitzuen Mankomunitateari eskatzen diote Urgatzi SL enpresari presioa egiteko, “begi bistako lan-baldintzak bete ditzan, hala nola kasuak guneka antolatzea, lan-arropa zerbitzua ematen den landa-ingurunera egokitzea, erabiltzaileen txostenak eguneratzea eta langileok autoaren gastua beren gain hartu behar ez izatea”. Era berean, Mankomunitateari eskatzen diote “ordu erdiko zerbitzua gutxienez ordubeteko zerbitzu bihurtzeko, langile guztiei udalerri guztietan aparkatzeko txartelak emateko eta senideei edo zaintzaileei atsedena hartzeko orduak eskaintzeko”.
Itaiako ordezkariek ere irakurri zuten komunikatua. “Instituzioek aurpegi aurrerakoia eta berdintasunaren aldekoa erakutsi nahi duten arren, emakume langileon bizi- eta lan-baldintzen kaskartzearen konplize zuzenak dira”, esan zuten. Gainera, azpimarratu zuten beste alde batera begiratzeak langileen lan- eta bizi-baldintzetan ez ezik zerbitzuan ere erabiltzaileengan ere eragina duela. “SADeko langileen aldarrikapenak babestea eta Mankomunitateari egoeraren ardura har dezan exijitzea guztion ardura da”.