Duela hilabete batzuk, Unai Zabalak sinadura-bilketa hasi zuen aitita eta Begoñako beste bost gudari Bilboko hilerrian, Derion, geratu zitezen. Azaldu zigunez, gudariak Zirardamendi mendian hil ziren 1936an eta han lurperatu zituzten, baina handik hainbat urtetara baserritar baten azalpenei esker atera zituzten lurpetik, eta Pikaza familiak Bilboko hilerrian duen panteoian hobiratu. Hilobiaren emakida iraungita, hura salgai ipintzeko asmoa zuen Bilboko Udalak, eta gudariak hezurtegi komun batean sartu. Hala ere, akordioa egin, eta gudariak Derion geratuko dira betiko.
Sinadura-bilketaz gainera, Zabalak zenbait bilera izan ditu Bilboko Udalaren eta Gogora institutuaren ordezkariekin. Kontatu digun moduan, azkenean akordioa egin dute alderdi guztiek eta Begoñako gudariak Derion geldituko dira, Bilboko hilerrian eraikiko den memoria gunean hain zuzen ere. Asmoa da gunea datorren urtean egitea, eta Begoñako gudariak zein hilerrian dauden beste gudari batzuk hara eramango dituzte.
Zabalak lau urte eman ditu Begoñako gudarien gorpuzkiak Pikaza familiaren panteoitik ez ateratzeko, eta hortaz, pozik azaldu da egindako akordioarekin. “Alde batetik, lortu dugu hilobiaren salmenta etetea, eta bestetik, gudariei esker ona betiko adieraztea”.
