Ekitaldiak goiz-goiz hasi ziren. Lehenengo eta behin, bi ibilaldi neurtu egin ziren: bata umeentzat, eta bestea helduentzat. Umeentzako ibilaldian 35 lagun ibili ziren, eta nagusientzako ibilaldian, 150 pertsona. Gainera, guztira 17 boluntariok parte hartu zuten ibilaldietan, eta lau txirrindularik. Era berean, txalaparta- eta musika-saioak egon ziren, eta herri-bazkaria egin zen. “Eguraldi txarra egon arren, herritarrek oso erantzun ona adierazi dute. Derio oso herri solidarioa da; nolanahi ere, aipatu beharra dago ekintzetara beste herri batzuetako lagunak ere etorri zirela”, adierazi zuten antolatzaileek.
Joan den udan, ELA diagnostikatu zioten derioztar bati, eta lagunak batu ziren ekintza solidarioa antolatzeko eta gaixotasun hori duten pertsonei laguntzeko ekarpena egiteko. Esan moduan, batutako dirua ADELA-Bizkaia elkarteari eman diote. Elkartearen helburu nagusia da ELA duten pertsona guztien eta haien senideen bizi-kalitatea hobetzea. Era berean, gizartea gaixotasun honekiko sentikor bihurtu nahi du, ELA dutenen errealitatea ezagutu dadin.