Hitzarmena Esther Apraiz Derioko alkateak eta Joseba Madariaga UNICEF Euskadiko arduradunak sinatu dute. “Deriorentzat albiste bikaina da Haurrekin Adiskidetsua den Herri bezala ezaguna eta aitortua izan ahal izatea. Haurrak tokiko politiken erdigunean ipintzeko egiten dugun apustua indartzen du ”, adierazi du Apraizek. “Gure umeek Derion iritzia eman, parte hartu eta pertsona moduan hazteko aukera izatea nahi dugu, eta seguru, entzunda eta errespetatua sentitu daitezen. Aitorpen honek bultzatzen gaitu umeekin eta euren etorkizunarekin konpromisoa duen herria eraikitzen jarraitzera”.
Udalak nabarmendu ditu bere gain hartzen dituen konpromisoetako batzuk, hala nola bizitza publikoan haurren partaidetza aktiboki sustatzea, haien eskubideak politika guztietan bermatzea eta haurtzaroarekiko edozein diskriminazioren aurka borrokatzea.