Uda honetan, eskolarik gabeko aldia aprobetxatuz, Lehen Hezkuntzako 1. eraikineko komunak eta aldagelak berritzeko lanak hasi dira. Esku-hartzeak 223.500 euroko aurrekontua du, eta lehenengo eta bigarren solairuetako instalazioak guztiz eraberritzea du helburu.
“Irisgarritasuna hobetu eta diseinua eguneratuko da, zentroari espazio modernoagoak, erosoagoak eta funtzionalagoak eskainiz. Obra honek 2020. urtean beheko solairuan egindako jarduketak osatzen ditu”, azaldu du Derioko Udalak.
Azken obra honekin, Udalak eskolako hiru eraikinetako komun eta aldagela guztiak berritu ditu, urteetako prozesu bati amaiera emanez. Hain zuzen ere, azken lau udatan egin dira aipatutako eraberritze lanak.
"Udalaren eta Eskolaren arteko sintonia onak elkarrekin lan egiteko aukera paregabea ematen digu, kalitatezko hezkuntza publikoan aurrera egiten jarraitzeko", nabarmendu du Esther Apraiz alkateak. "Gure konpromisoa da hezkuntza-instalazioak mantentzea eta hobetzea, garai berrietara egokituz eta ikastetxeko haur eta profesionalentzako ingurune inklusiboak, seguruak eta estimulatzaileak ziurtatuz".
Patio berria
Obra hau heltzen da apirilean patio berria amaitu ondoren, ikastetxearen kanpoko espazioa eraldatu duena; jolas-ingurunea “sortzaile, inklusibo eta irisgarri” bihurtzeko egin zuena Udalak. Horretarako eraiki ziren berdeguneak, ur-jolasak, musika-panelak, oreka-eremuak, bi metroko zabalera duen bidexka irisgarria eta 155 m2-ko eremu estalia, euria egiten duen egunetan erabiltzeko.