“Saio hauetan parte hartzen dutenek luzaketak, arnasketa-ariketak eta ongizaterako oso onuragarriak diren beste jarduera batzuk egiteko aukera izango dute”, azaldu dute. Horretarako, arropa eroso eta zabala, oinetako egokiak eta eguzkitako txanoa edo bisera eramatea gomendatu dute. Jarduera urrira arte luzatuko da, abuztuan izan ezik.
Tai-chi saioek urtero izaten duten “harrera ona” ikusita, Derioko Udalak berriro martxan jarri ditu Uribe Parkean egiten diren doako ikastaroak. Apirilaren 7an eman zieten hasiera. Ikastaroak martitzen eta eguenetan dira, 11:15etik 12:15era. Aurten ez da beharrezkoa Kultur Birikan izena ematea, nahikoa da nahi den egunean bertaratzea.