Derioko Udalak irailaren 30era arte zabalik du udalerrian erroldatuta dauden 18 eta 35 urte arteko gazteei zuzendutako etxebizitzaren alokairurako udal laguntzak eskatzeko epea. “Horrela, udalak gazteen emantzipazioa erraztu eta etxebizitza eskuratzeak dakarren ahalegin ekonomikoa arintzen lagundu nahi du”.
Deialdiak 20.000 euroko aurrekontua dauka, eta 2025ean Derion ohiko etxebizitzaren alokairuagatik ordaindutako errentak diruz laguntzea du helburu. Laguntzak alokairu errentaren %50 estali ahal izango du gehienez, kontratu bakoitzeko hilean gehienez 300 euroko mugarekin. Ezarritako baldintzen artean dago, 2025ean pertsonako 30.000 euroko diru sarrerak ez gainditzea.
Telematikoki Derioko Udalaren egoitza elektronikoaren bidez edo aurrez aurre Herritarrentzako Arreta Zerbitzuan aurkeztu daitezke dokumentuak. Laguntzak eskaerak aurkezten diren hurrenkeraren arabera emango dituzte, “betiere behar bezala beteta badaude eta espedientea osorik badago, aurrekontuan erabilgarri dagoen kreditua agortu arte”.
Esther Apraiz Derioko alkateak nabarmendu du laguntza lerroak herritarren artean “oso presente dagoen kezka bati” erantzuten diola: “Etxebizitza eskuratzea gizarte gisa aurrean ditugun erronka handienetako bat da, eta bereziki eragiten die gazteei. Udaletik gure esku dauden tresnak baliatu nahi ditugu emantzipatzeko, beren bizi proiektua garatzeko eta, hala nahi badute, etorkizuna Derion eraikitzen jarraitzeko aukera izan dezaten”.
Udalak ekimen honek orain arte egindako ibilbidea ere balioan jarri nahi du. 2024an hiru laguntza eman ziren, guztira 8.550 euro. 2025ean bost laguntza eman ziren, guztira 10.509 euro.
“Datu horiek sendotzen jarraitu nahi dugun lan ildo baten emaitza dira. Etxebizitzak zuzenean baldintzatzen ditu emantzipazioa, egonkortasuna edo bizi-proiektu bat garatzeko aukera bezalako funtsezko aspektuak. Horregatik, administraziook ahaleginak batu behar ditugu aukera gehiago eskaintzeko”, adierazi du Apraizek.
Derion bizitzeko aukera
Deialdi hau, gainera, etxebizitza prezio eskuragarrietan lortzeko aukerak handitzeko eta Derion errotzea sustatzeko Udalak garatzen duen estrategia zabalago baten barruan kokatzen da. Udalak Aldekone Goikoan, Jardinetxe Plazan, alokairu eskuragarriko babes ofizialeko 88 etxebizitzako sustapena ere bultzatu du. Sustapenak logela bateko 24 etxebizitza eta bi logelako 64 etxebizitza izango ditu; azken horietatik lau egokituak izango dira.
Biek ala biek helburu bera dute: udalerrian etxebizitza bat eskuratzeko aukerak zabaltzea, bereziki gazteei eta merkatu libreko prezioei aurre egiteko zailtasun handienak dituzten pertsonei begira. “Pertsonek Derion geratzeko, bizitzeko eta beren etorkizuna hemen eraikitzeko benetako aukerak izatea nahi dugu. Etxebizitza eskuratzea erraztea herrian errotzea, ongizatea eta gizarte-kohesioa indartzea ere bada”, adierazi du alkateak.