Pintxo solidarioak 762 euro batu ditu Erandiogoikoan

Pintxo solidarioen ibilbidea Danontzat Loiuko elkarteak eta Erandiogoikoko jai-batzordeak antolatu dute eta, azaldu diguten moduan, poz baino pozago daude herritarrek erakutsi duten solidaritatearekin. “Orotara 762, 65 euro batu dugu. Pintxorik jaten ez zuenak ere dirua sartzen zuen itsulapikora”. 

Pintxoak Erandiogoikoko tabernek eta elkarteek eman zituzten eta euro batean saldu ziren. Batutako dirua Gurutzetako ospitalean dauden eta minbizia duten umeentzako jolasak erostera zuzenduko dute  

Bestetik, Danontzat elkartetik esan diguten moduan, Loiuko jaietan ere egingo dute pintxo solidarioen ibilbidea. Ekintza Udalarekin eta Loiuko Bakarrak gazte elkartearekin antolatu dute eta ibilbidea hurrengo hau izango da: Loiuko Bakarrak elkartearen txosna, Jubilatuak, Batzokia, Loiu hotela, Lashoa, Larrakoetxe kirol taldearen txosna eta Loiuko Bakarrak elkartearen txosna. Gainera, azken geldialdi honetan Txoribikers taldeak emandako pintxoak ere egongo dira. Poteoa arratsaldeko 7:30ean hasiko da eta batzen den dirua aurreko lerroetan aipatutako helburu berara zuzenduko dute: Gurutzetako ospitaleko onkologia atalean dauden umeentzako jolasak erostera. Pintxoak Loiuko tabernek eta elkarteek emango dituzte.