Zamudioztarra Ingalaterrara joan zen gerrako umeekin, eta etxera itzulita, Francoren administrazioak lan egiten uzten ez zionez, hainbat urtetan Palazioan ibili zen eskola ematen, 60ko hamarkadan Eskola Nazionalean lanean hasi zen arte. Historia xumea da berarena, baina mirestekoa zamudioztar askorentzat, batez ere irakasle izan genuenontzat.
Bestalde, egitasmo erraldoi honek esfortzu ikaragarria ekarri du, taulara 80 aktoretik gora igotzeaz gain, oihalaren atzean beste hainbat ibili zirelako agertokia ipintzen, arropa lortzen, koplak eta dantzak sortzen…
Amaitzeko, eskerrak bereziki lagun biri eman nahi dizkiet: batetik, Etxahun Lekueri, ehundik gorako koplekin istorioa gorpuztu duelako; eta bestetik, Josu Camarari, gure zuzendariari, bere pazientzia amaigabeari esker bakoitzaren onena ateratzeko gai izan delako.