Liburuak, nobelak, olerkiak, komikiak, edo edonork nahi duena ere irakur daiteke Ebook-etan, audio liburuetan, Kindlen... Milioika daude eskuragarri, bai, milioika, izenburu mota guztietako irakurleen gusturako. Hala ere, gaira bueltatzen naiz: gazteek irakurtzen al dute? Bada, baietz dirudi, edo hori adierazi dute, behintzat, 14 eta 24 urte arteko inkestatuen %70ek. Beste kontu bat da zeri deitzen dioten irakurtzea, baina hori dagoeneko gustuen kontua da.
Duela egun batzuk, liburu saltzaile batek esaten zidan paperezko liburuen salmenta izugarri jaitsi dela. Gehien saltzen diren liburuak haur eta gazte liburuak direla ere esan zidan. Gazteen kasuan, neska gehiago dira mutilak baino, antza denez, eleberri erromantikoak eta beldurrezkoak nahiago dituzte. Ez du axola nork idazten dituen, idazle onak ala txarrak; garrantzitsuena da maitasun, desengainu edota traizio asko izatea, erromantikoen kasuan. Besteetan, izua, banpiroak, beste mundu batzuetako izakiak, izpiritu onak eta gaiztoak...
Gazteei esango nieke irakurtzeko ez duela axola generoak, baina dramatzar erromantikoak gustuko dituztenei Tolstoiren ‘Ana Karenina’, Emily Brontëren ‘Tontor ekaiztsuak’, edo Alexandre Dumasen ‘Kamelietako dama’ bezalako lanei begiratu bat emateko. Terrorea nahiago dutenei, Stephen Kingen ‘Carrie’, Bram Stokerren ‘Drakula’, H.P. Lovecraftren edozein nobela, edo Mary Shelleyren ‘Frankestein’. Liburu potoloetarako astirik ez badute, irakur ditzatela Edgar Allan Poeren kontakizunak. Amestu, negar egin edo ikaratu ez ezik, literaturaren benetako maisuek idatzitako lanak ere irakurriko dituzte. Gauzak argi esan ditzagun: idazten duen oro ez da idazle ona, edo kantaria ere ez da sehaska-kanta kantatzen duena, edo margolari bat paper orri bat margotzen duena...